Denimg : Trilaksito Saloedji
Wong tuwaku sakulawarga pindhah
menyang kutha Malang ,
manggon ing omah sewan. . Let telung taun banjur mundhut tanah ing njero gang.
Satus meter saka dalan gedhe sing tumuju kutha Batu. Asale tanah kagungane Pak
Sadi. Gunggung ambane satus meter pesagi
luwih. Ananging wangune aneh. Ora aneh
piye, wong wangune tanah kaya aksara P. Nggon sikilane
aksara P kuwi ambane loro setengah
meter, dawane sewelas meter, dumadi saka telung teras. Limang meter kapisan tanahe luwih endhek patang puluh
centimeter. Telung meter sawise kuwi luwih endhek maneh patang puluh
centimeter. Telung meter kang pungkasan luwih endhek maneh. Ing kono ana sumur
lawas kanthi jedhingan ing sisihe sumur sing dibangun sangisore tanah waras.
Jerone jedhingan suwidak centimeter. Ing njerone ana bak cilik, bisa diisi
banyu kanggo adus. Wong sing arep adus nyemplung jedhingan dhisik, banjur
ndhodhok ben ora katon dening liyan, jalaran jedhingan kuwi tanpa aling-aling.
Nanging Pak Sadi isih ngajokake
syarat, celathune menyang bapak : ’’Mas Dji manawi panjenengan sampun cecek,
kepareng kula gadhah panyuwunan’’. Wangsulane bapak : ’’Oo inggih, menapa Dhi
?’’ - ’’Siti kula menika ing lingkungan
keluarga, ing poncot kidul wonten sumur ingkang dipun damel sesarengan. Pramila
kula nyuwun, saksampunipun siti kapundhut
kepareng para sadherek dalem taksih saged langkung latar panjenengan lan
mendhet toya saking sumur punika saben dinten sarta adus wonten ing ngriku’’.
Sarehne wis
raket karo sing kagungan tanah, mupakat
lokasine lan jumbuh karo anane dhuwit, mula wong tuwaku sarujuk karo panjaluke
Pak Sadi.
Wong tuwaku banjur yasa omah
klenengan madhep ngalor. Separo tembok bata dhuwure sameter.Sandhuwure nganggo
gedhek kulitan pring, banjur di lepa nganggo luluh lan semen. Tanah ing sikilane aksara P kang arupa teras-teras, pinggirane dikuwati karo plengsengan bata, dadi ing
sateruse ora dukuwatirake kegerus banyu. Wong tuwaku uga mbangun jedhing kanggo
pribadi kanthi lawang madhep ngalor sacedhake jedhingan umum
Tangga teparo isih sanak kadange
Pak Sadi. Ing sisih lor-e daleme wong tuwaku arupa tanah kosong. Sisih wetan
utawa sisih tengen, omahe Pak Min. Sisih kulon omahe Pak Kadi banjur Pak Jadi
lan Mas Is. Tritis kulon daleme wong tuwaku adu tritis karo omahe Pak Kadi,
dadi dalane wong-wong sing arep nyang sumur. Sisih lor-kulon omahe Pak Sarto
lan Mbah Ten. Sisih kidul omahe Pak Ayik. Yen dietung sing migunakake sumur ana
wolung keluarga utawa patang puluh jiwa.
Sumur lawas kuwi dumunung ing
perangan tanah kang paling ledhok. Sisih kidul winatesan barongan pring kang
ora amba. Ing ngisore barongan ana wangan (kali cilik), sing dipigunakake
kanggo bebuwang. Sumur siji dipigunakake wong semono kehe. Piye olehe ngatur
gilirane supaya ora ana padudon. Ndilalah kersane Allah selawase iki ora ana
cecongkrahan sing marahi dadi crah karo tangga teparo. Tangga-tangga ngerti
manawa sumur kuwi klebu bageyan tanahe Pak Sadi sing wis didol. Dadi yen bapak utawa aku nimba
lan ngangsu, wong-wong kuwi ora wani nyelani. Kira-kira tangga teparo ngerti
manawa ngampung utawa nunut murih bisa oleh banyu. Jalaran panganggep kaya
ngono kuwi banjur tumus sikep ora melu
handarbeni, tundhone banjur ora gelem melu hangopeni. Manawa ana
karusakan tali utawa timbane, wong-wong kuwi ethok-ethok ora weruh.
Lambe sumur saka pasangan bata
kang dilepa alus. Kahanane isih pengkuh. Sandhuwure sumur ana palang wesi
kanggo nyantholake kerekan.. Kerekan wesi kuwi gedhe pigunane kanggo
ngenthengake ngangkat timba isi banyu saka njero sumur. Apamaneh sumur kuwi
jerone limalas meter. Yen nyawang saka lambe sumur, lumahe banyu katon mencit
adoh ing ngisor.
Tali kang dipigunakake yaiku
irisan karet ban sing wangune rada mesagi. Sanajan katon kandel ananging tali
karet kuwi bisa rantas lan pedhot. Yen nyambung nganggo kawat. Kawat kang
gesekan karo kerekan wesi suwe-suwe bisa pedhot uga.
Sawise subuh lan sadurunge ashar
aku lan adhiku nimba lan ngangsu. Ngisi jedhing njaba lan jedhing njero. Banyu
jedhing njero kanggo pasediyan masak, korah-korah lan kaperluwan liya. Saliyane wektu kuwi dianggo tangga teparo
kanggo ngangsu, adus lan umbah-umbah bareng-bareng. Ana kang ngangsu, ana kang
umbah-umbah lan ana kang adus. Yen wis
ngono swasana sakupenge sumur rame dening pacelathon lan guyon.
Banjur keprungu swara “jleguuur”, sepisan, banter banget,
nggemontang nyuwek swasana wengi kang tintrim. Bapak lan ibu mireng. Gek ana
apa ? Kabeh kanthi panggrahita lan panyangkane dhewe-dhewe. Apa swara senjata,
apa mriyem, apa gunung Semeru mbledhos ? Ngendikane bapak : ’’Swarane kaya ora
adoh saka kene’’.
Saka mburi krungu swarane Pak
Ayik lan bojone nanging ora pati cetha. Saka lor-kulon krungu rame-rame swarane
Pak Sarto, bojone lan anak-anake padha metu saka omah. Banjur keprungu Pak Min
dikanthi bojone metu pisan. Krungu pitakone Pak Min, kaselan watuke : ’’Ana apa
Sar ?’’. Ana sing mangsuli : ’’Embuh Dhe, kok ana swara njlegur banter
banget’’. Bapak mbenakake sarung, ngagem kacamata banjur metu, ditututi wong
saomah. Ora suwe ing latar ngarep omah
kang remeng-remeng ana wong lan bocah-bocah limang somah padha pating jrabing.
Ngrembuk anane swara njlegur kang banter banget. Kabeh padha caturan kanti
panyakrabawane dhewe-dhewe.
Ngendikane bapak nyigeg caturan
kang ora ana alang ujure : ’’Sing kagungan sentolop sami dipendhet, mangga
nuweni teng wingking’’. Pating jrantal wong-wong lanang mulih njupuk
sentolop. Bocah-bocah cilik nangis
amarga dipenging melu. Bapak jumangkah liwat tritisan kulon omah kang peteng
tumuju sumur. Dikinthil sabregada tangga teparo lanang wedok lan bocah-bocah,
kaya arep nglurug ing palagan. Tekan mburi ketambahan Pak Ayik sakulawarga.
Saya rame mecah wengi. Njekute adhem kasilakake niyat golek sisik melik ngenani
swara njlegur kang gemontang durung suwe iki. Sawatara bocah-bocah cilik
ngaweruhi petenge ing swasana sakiwa
tengene sumur, barongan lan wit-wit kang ngrembuyung, banjur nangis njempling
saur manuk. Tangga teparo tau crita manawa barongan cedhak sumur kuwi isih
angker. Sing mbaureksa ora nrimakake yen keganggu katentremane. Keprungu swara
sing murina
nyang anake. Ibune ngejak mulih, kuwatir yen nangise anake
amarga meruhi barang alus ing barongan kang peteng ndhedhet.
Bapak lan tangga-tangga padha
nyentolopi sakiwa tengene sumur, jedhing lan barongan sarta dalan mudhun
njlojog tumuju wangan kang kanggo bebuwang. Bapak ngendika kaget : ’’Lho kok….
?’’. Ana sing tanggap : ’’Onten napa Mas Dji ?’’ Wangsulane bapak : ’’Kados onten sing ical’’ - ’’Napane sing mboten onten ? Ngendikane
bapak maneh : ’’Tali timba’’. Swarane wong-wong saur manuk. – ’’Hiya taline gak
ana’’ - ’’Terus sapa sing kumawani
nyolong ?’’ – ’’Paling ya kecemplung sumur’’. – ’’Nek ngono sing nywara jlegur
mau ya timba lan taline’’ - ’’Nek mung
tali lan timba kecemplung sumur mosok swarane banter banget ?’’ - ’’Kira-kira ana kucing kerah uber-uberan,
njur sing siji mencolot nyang timba sing dhong ana ndhuwur’’. Ana sing takon :
’’Pak Ayik, omah sampeyan sing cedhak sumur, krungu kucing kerah tah ?’’ –
’’Kados mboten mireng napa-napa’’.
–’’Bek-e ana sing ngisi timba karo watu gedhi njur dicemplungake
sumur’’. – ’’Sampeyan aja ngarang’’. – ’’Bisa uga ana sing nimba, njur taline
ucul’’. - ’’Ah mboten mungkin, sinten
sing nimba ajenge adus dalu-dalu adheme njekut ngeten’’.
Bapak meneng bae. Nyentolopi
saben pecak sakiwa tengene sumur, jedhingan lan barongan. Kabeh cep klakep
nalika bapak alok sora : ’’Lho niki napa ?’’, karo nyatitekake wewujutan ireng
dawa sapinggire barongan. Wong-wong lanang padha nyedhak lan nyawang. Pak Ayik
ing sacedhake bapak alok :’’Wo tiwas dheg-dhegan, tak arani ula’’. - ’’Genah tali timba ngene’’, Pak Jadi nywara
karo nyekel tali banjur ditarik, pranyata sabageyan temangsang ing antarane
pring lan gegodhongan. Pak Sarto nywara :’’Iki genah pokale wong, gak mungkin
nek kucing utawa medi duwe pikiran kaya ngene’’ – ’’Genahe piye?’’, Pak Min
nrambul pitakon. – ’’Genah ana sing nimba, banjur taline pedhot nggon
sambungan, ben gak kadenangan karene tali dibuwang, nanging marga kesusu olehe
mbuwang ora pas, isih ana sing cedhak sumur, kadenangan Pak Dji iki mau’’.
Swasana tintrim. Kira-kira padha ngrames teorine Pak Sarto. Ana siji sing
cemuwit : ’’Aku lan keluargaku wis mulih saka sumur jam lima lho’’. –
’’Aku Hiya’’. –’’Mas Sarto, sampeyan sujana nyang sapa ?’’, ana swara
setengah murina. Pak Sarto nywara gak
kalah
serenge :’’Sapa
sing sujana, coba pikiren apa iki pokale kucing apa medi ? Wis genah iki
pokale manungsa. Aku ora ndumuk sampeyan utawa sapa tah sapa’'
Ana swara wadon sing
nyela :’’Sing gak ana ing kene bek-e sing nyemplungne timba’’. Langsung
ana sing nywara sengak : ’’Sampeyan mpun mungel ngoten Yu, Pak Kadi saanak
bojone mboten nate mendhet toya ngriki sanajan griyane teng ngriki’’.Ana sing
nyauri : ’’Bek-e sing mondhok’’ – ’’Hiya bek-e’’. – ’’Tapi iki rak preian
sekolah, kaya durung ana sing balik’’..
Bapak ngendika kanthi sareh :
‘’’Sampun, sampun, ngaten mawon, mangga sami kondur niki pun dalu, nyuwun
tulung taline diringkes salap teng griya kula’’.
Esuke aku ora bisa nimba lan
ngangsu. Tujune banyu jedhing njero isih akeh amarga sore mau dikebaki. Nanging
nalika swasana isih repet-repet aku nginguk sumur. Aku nyawang kerekan lan
panggonan tali kang kemlewer sing ditemu bapak mau bengi. Mripatku mandheg
nyang jedhingan, ana wadhah sabun sak sabune pisan sarta sikat gigi. Ing
ngisore ana bungkusan plastik, isine kampes (sweempak) warna putih. Barang-barang
mau tak gawa mulih, ora ana sing weruh. Pucuk-e tali karet ban ing omah tak
iling-ilingi. Kawat sing nyambung tali pedhot. Dawane tali pitung meter. Dadi
bener pangirane Pak Sarto. Iki genah pokale manungsa. Nalika timba wis isi banyu, tali ditarik, kawat sing nyambung wis rada rantas marga
gesekan terus karo kerekan wesi, banjur pedhot. Timba isi banyu ceblok saka
dhuwur watara wolung meter, natap lumahe banju mahanani swara jlegur kang
banter amarga luweng sumur nyiptakake gema kang dirambatake nyang sanjabane
sumur.
Sing isih dadi pitakon, sapa sing
bengi-bengi nimba lan tanpa sengaja nyemplungake timba ? Nalika aku lan
adhik-adhikku budhal sekolah (mung raup), tangga teparo saanak bojone lagi
mulih saka belik sapinggire kali Brantas. Bapak mengko arep siram ing kantor,
lan ibu arep siram ing daleme budhe. Ing pucuk gang aku ketemu Kadino putrane
Pak Kadi. Aku takon : ’’Cah sing mondhok apa durung teka ?’’ Wangsulane :
’’Sawise maghrib Mas Nasir teka, njaluk kunci lawang mburi nyang aku. Ana apa
ta ?’’. –’’Aku mung takon, kok omahmu sepi’’.
Mulih sekolah, kampes misterius
tak jereng, tak wolak walik.Ana tandha warna coklat, arupa titik-titik wujud
aksara “AN”. Carane nggawe kira-kira nganggo godhong suruh sing
dijojohi sandhuwure
kampes iki. Tandha ngene iki biyasane digawe bocah sekolah sing ana
asrama utawa mondhok. Supaya barange ora kleru nyang kancane.
Aku sujana nyang bocah-bocah sing
kos ing omahe Pak Kadi. Nanging sing disujanani durung ana sing bali nyang
kos-kosan. Kadino mau esuk pancen kandha manawa Mas Nasir wis teka. Tapi mau esuk kok ora pethuk lan
ora krungu swarane.
Sorene bapak kondur saka kantor
karo Pak Djabir (andhahane bapak). Ngasta barang abot diwadhahi karung. Sawise
ngaso sawatara, Pak Djabir tumandang gawe. Nyambung tali karet irisan ban karo
timba. Wangun timbane gepeng, setengah lingkaran (dawane rong kilan), ambane
watara sakilan. Banjur dipasangake ing kerekan pisan. Aku terus ngangsu, ngisi
jedhing mburi lan jedhing njero omah. Bubar adus, Nanto kancaku sekolah teka. Ngejak
ngendhangi mas-e ing asrama PGA. Aku takon : ’’Wingi kowe rak nyang Malang bareng masmu, saiki kok wis ngendhangi ?’’ Wangsulane : ’’Anu, buku
lan klambine ana sing katut tasku’’.
Ing asrama PGA jagongan rada
suwe, mase Nanto yen omong-omongan nyenengake. Aku takon : ’’Mas, kapan wiwit
mlebu sekolah’’ – ’’Mau esuk Dhik’’ – ’’Sing mondhok cedhak omahku kok durung
bali ?’’ – ’’Sapa ?’’ – ’’Undang-undangane Nasir, embuh jangkepe’’ – ’’Nasir ?
Oo Abu Nasir, mau wis
ana ki. Jarene dheweke mondhok, tapi mau bengi teka-teka dheweke omong -
tulung, aku tak ngungsi kene dhisik-’’.
Pepuntone atiku : ’’Kampes
nganggo initial “AN” tibake duweke Abu Nasir. Dheweke “ngungsi” amarga ora gelem
tanggung-jawab’’ – ’’Lha kae areke’’. Mas-e Nanto ngawe lan omong rada banter :
’’Sir, rene Sir’’. Nasir mara. Mak jegagik, dheweke kaget bareng weruh aku.
Pitakone : ’’Lho kok nok kene ?’’. Aku ganti takon : ’’Lha kowe kok ana kene
?’’ Dheweke kecipuhan, ora nyawang apadene mangsuli. Celathuku : ’’Kadino
crita, jare kowe wingi sore wis
teka. Malah aku ya weruh kowe mlebu omah. Sabubare isya’ metu liwat lawang
mburi’’. Dheweke katon bingung. Aku wis nekat
mojokne, amarga aku wis
yakin yen dheweke, kang gawe “gara-gara
sumur” mau bengi. Aku kudu ngajar wong kang ora tanggung jawab, celathuku :
’’Kowe gak mulih nyang pondhokan tah ? Nek nggoleki kampes, sikat gigi lan
wadhah sabunmu, tak simpen nyang omah’’. Praenane dadi abang ireng nanging ora
wani nyawang aku. Nandakake batine ngaku nek salah. (BSL, 04/03/12)-(DB,26/03/12)
Tidak ada komentar:
Posting Komentar
Terimakasih sudah berkunjung di blog ini, sekarang tinggalkanlah jejak kamu di blog ini dengan cara berkomentar di kotak komentar yang sudah disediakan.
Gunakanlah akun Google kamu atau dengan menggunakan name/URL blog yang kamu punya. :-)